بقلم : اسلام المصري




يادنيا شفت فيكى
أشكال وألوان
شفت فيكى الواطى
وقت الشدة بيبان
والأصيل بيدى
فى السر والكتمان
شفت فيكى الغلاباوى
وطويل اللسان
شفت كمان المحروم
وبالقليل قنعان
وجيبه يبقى فاضى
وتحسبه مليان
وفى بيته كريم
مهما كان شقيان




وشفت صاحب الأموال
يسرق كمان وكمان
ودايما جبان وبيخاف
على ماله من النقصان
عمره مايوم ينفق
ولا يعطف على إنسان
يادنيا فيكى الإنسان
باع نفسه للشيطان
وليه بيتقاتلوا عليكى
وإنتى مفكيش الأمان
ملقتش فيكى يادنيا
أغلى من الإطمئنان
ولا سعادة فيكى
زى النوم فى أمان
شفتك بتضحكى يادنيا
على اللى فيكى طمعان
وتتعبى اللى عايز
يبقى على طول كسبان
وبتشقى اللى عايز يجمعك
وفاكر إن دا الأمان
وفى النهاية يادنيا
الكل فيكى ندمان
حتى فاعل الخير بيندم
إنه معملش كمان وكمان