بقلم : فرح هشام




الاسوء لم يأتي بعد جمله اتقالت وظهرت بعدها سلالات كتير لحد وقتنا هذا.. الجمله دي قالها رئيس منظمه الصحه العالميه في مؤتمر من المؤتمرات الي بتتعمل عن المستجدات في ڤيروس كورونا..




طب اي بقا اللي ظهر جديد علينا.. سلالات كورونا عماله تكتر منها الضعيف الي ممكن يجيلك متحسش بيه ومنها القوي الي تحس بيه بس متحتاجش تتنقل مستشفى ومنها القوي جداً اللي بيصيبك و ممكن يوصلك لحاله من تآكل الرئه ومشاكل كبيره في الجهاز التنفسي بالتحديد و يؤدي الي الوفاه.. حالياً اهم حاجه ظهرت و تم الاعلان عنها من قريب هو “الفطر الاسود” طب ايه هو بقا الفطر الاسود و ليه اتسمى كدا وايه علاقته بڤيروس كورونا ؟




من حوالي شهر اعلنت الهند عن الفطر الاسود واللي قتل اكتر من ٩٠٠٠ شخص و اعلنوا حاله الطوارئ .. الفطر الاسود مش جديد علي فكره دا ظهر سنة ١٨٥٥ و اتصاب بيه حاله واحده بس علشان كدا الاطباء والعلماء وقتها مهتموش بيه اوي واعتبروه حاله عرضيه وعدت خلاص ..

اتسمى بالفطر الاسود لانه بيعمل بقع سودا علي جسم المريض و الفطر الاسود هو عفن موجود في الخضروات والفواكه الفاسده وبيتنقل من خلالهم و بيأثر علي الجيوب الانفيه و الرئتين والمخ والجهاز الهضمي و هو فطر من وسط فطريات كتير ممكن انها تدخل جسمنا و لكن البطل هنا بيكون جهاز المناعه اللي بيتصدى للفطريات دي و بيمنعها انها تسبب لنا اي امراض..

اعراض الفطر الاسود ظهور قرح سودا علي الجسم وتورمات في الوجه وصداع ونزيف في الجهاز الهضمي.. الفطر الاسود علاقته بكورونا ان كتير من بروتوكلات كورونا كانت بتضعف المناعه والمرض دا مبيصبش غير الاشخاص اللي مناعتهم ضعيفه .. يعني لو مناعتك قويه صعب جدا تتصاب بيه..

والمعلومات عنه بتقول انه مش بيتنقل من انسان لانسان يعني مش معدي وان لحد دلوقتي مفيش حالات منه في مصر لكن الحكومه عملت عزل احتياطي لو حالات منه ظهرت في مستشفى النجيله في مرسى مطروح وحاليا عشان تحمي نفسك من السلالات الجديده الي بتظهر و كورونا بشكل عام حاول علي قد ما تقدر تقوي جهازك المناعي و طبعا متنساش الالتزام بالاجراءات الاحترازيه لان الاسوء لم يأتي بعد.