بقلم : فرح هشام




هتقدر مش مجرد عنوان لمقالي النهارده هتقدر عباره عن تجربة حقيقية بتبين اد اي انت ممكن تكون انسان الدنيا جاية عليك او حطيتك ف ظروف صعبة والي هو اختبار من ربنا عشان بيحبك و بتحس ساعتها انها اتقفلت ف وشك وانك مش هتقدر تحقق اي حاجة.. من واقع تجربة حقيقية كتير الدنيا بتيجي علينا وتحطنا ف مواقف صعبة بس الجدع الي يقدر يعتبر الظروف دي حاجة ايجابية تساعده علي انه يكون اقوي مش تهده.. اي ان كان ظروفك ركز علي نجاحك.. هدفك.. استمد قوتك من نفسك ومن اي اشخاص ايجابية معاك ف الوقت دا بالتحديد حاول انك تبعد عن اي سلبيات مهما كنت مضطر تتعامل معاها.. واللي لازم نعرفه كويس ان الدنيا مش دايما هتكون حلوة زي ما البعض احيانا بيكون متوقع و انها حرفيا ممكن تتقلب في ثانيه من حلو لوحش و احيانا العكس..




نجاحك مبيتوقفش غير علي نفسك صدقني اي حد حواليك مهما كان بيحبك مش هيقدر يساعدك غير مساعده معنوية لكن لو انت شخصية واقعية هتكون فاهم كويس ان انت قائد نجاحك ومحدش هيقدر عليه غيرك..
والاهم من كدا متقعدش تقارن نفسك بالناس وتقول اشمعنا فلان بيحصله وانا لا اشمعنا فلان متقدم عني او اعلي مني في حاجة وانا لا.. صدقني انت ممكن تكون باصص لحاجة عنده ولكنك متعرفش كواليس حياته ايه مهو لكل شخص فينا كواليس في حياته ووقعات بتحصله وطبعا الانسان مش هيظهر قدامك غير الايجابيات ف منتخيلش ان في حد حياته حرير او بلا مشاكل.. ارضا بما قسمه الله لك تكن اغني الناس.. وفي النهاية احب اقول ان النجاح و انك تكون متقدم في حياتك وفي مجالك متوقف عليك انت بس مش علي حد تاني.. ومتوقف علي انت شخص قد ايه قوي وايمانك بالله قوي..