بقلم : فرح هشام




في الفتره الاخيرة زادت حالات ان راجل يقتل مراته او انه يتعدي علي بناته وعليها و في ناس كتير بتستغرب ليه هما مكملين ومع الاسف في ناس كتير متعرفش ان الاهل بيبقوا هما السبب في دا.. كلمة “كملي عشان البيت او عشان الولاد او ميتقالش عليكي مطلقة” دا بيكون رد معظم الاهالي لما بتجيلهم بنتهم عندها مشكله مع جوزها وبتضطر انها تكمل عشان اولادها وتستحمل المشاكل والضرب والاهانه لمجرد انها مش هتقدر ترجع لاهلها عشان مش هيصرفوا علي ولادها او انهم مفيش مكان ليها ولولادها او حتي ميتقالش عليها مطلقة لان كلمة مطلقة ف مجتمعنا تعتبر جريمه ومش فاهمين ليه نظره المجتمع للست المطلقة انها ست مش كويسه وبيرموا اللوم عليها ف حين ان ممكن يكون العيب من جوزها ودا سبب الانفصال..




وهنا بيكون نتيجة ان الست بتستحمل انها ممكن توصل ان جوزها يقتلها من كتر الضرب او يجيلها حالة نفسيه ويطلع اولادها الي استحملت عشانهم نفسيتهم مش سوية بسبب افعال ابوهم.. وفي الفتره الاخيره تم اصدار قانون ضد الراجل الي بيضرب مراته بحبسه 5 سنين وكان في اعتراض كبير من الرجاله على القرار دا.. الستات المفروض متستحملش اي حاجة ولو مشكلتك ف قرارك ماديه اشتغلي او حاولي تلاقي حل لنفسك والشقه من حق اولادك القانون اصبح مُنصف للمرأة وانتي مش جماد عشان تستحملي الضرب والاهانه اعترضي و متخافيش من كلمة مطلقة لان الناس مش معاكي وانتي بتتأذي نفسيا وجسديا.. الناس كدا كدا بتتكلم ودا مجتمعنا وغالبا مش بيتغير.. والرجاله الي خدت من القران كله كلمه اضربهن.. ياريت تفتكروا عاشروهن بالمعروف باردو وافتكروا ان نفسك غاليه وهتتحاسب عليها ف متستحمليش اي حاجة مش مرضية لمجرد الخوف من المستقبل لان ممكن يكون دا نهايته موتك..