بقلم فرح هشام




في الفترة الاخيره ظهر تطبيقات كتيرة زي التيك توك و like وحاجات كتيرة زيهم والاطفال بدات تتاثر بيها كمان بشكل كبير و فئة المراهقين كمان

خلينا نقول انه معظم التحديات الي بتحصل علي التطبيقات دي بتكون خطر جدا و في بعض الاطفال كانت بتجربها زي ان بنت جربت على صاحبتها تحدي من دول و هما اطفال لا يتعدوا ال 15 سنه و النتيجة كانت انها قتلتها والموضوع دا حصل هنا في مصر ودي مش الجريمة الوحيده في مصر بسبب التطبيقات دي
‏



‏وللاسف مبقوش الاطفال والمراهقين بس بيتفرجوا علي التطبيقات دي لا كمان بقوا مشاركين فيها بشكل كبير وبكل الطرق و الوسائل بحثاً عن الشهرة ولا يهمهم الاسلوب الي بيظهروا بيه وخصوصاً البنات.. ‏كمان في الفترة الاخيرة ظهر العاب كتير زي بابچي و العاب الاونلاين بشكل عام الي ممكن الاطفال يقعدوا بسببها ع الموبايل او التابلت لوقت كبير جدا و اخرتها بيكون ان الطفل او الشخص الي بيلعب نظره بيبتدي يضعف و بيحصله تأثيرات ضارة كتير بسبب الموبايل..

مفيش حد مبقاش بيقعد ماسك الموبايل او قدام ال لاب توب او الكمبيوتر ولكن المشكله هنا ازاي نعرف نتحكم في نفسنا اننا منخليش السوشيال ميديا و الجيمز دي تاكل وقتنا ووقت اطفالنا و يستغلوه في حاجة مفيدة مع ان للاسف حتى الدراسة بقت اونلاين..

ولكن لازم نحاول نسيطر علي نفسنا وعلي اولادنا باننا نقابل اصدقائنا بشكل حقيقي ونقعد معاهم احسن ما نكلمهم على السوشيال ميديا.. نستفيد من وقتنا في القراية او الشغل او الدراسة.. نستفيد بأننا نلعب رياضة او نخرج منخليش حياتنا كلها عبارة عن موبايل او لاب و بس لان حقيقي كل دا بياكل وقتنا و مش بننجز اي حاجة وبيضر كمان صحتنا.. وبالنسبة لاطفالنا احنا نقدر نتحكم في عدد الساعات الي بيمسكوا فيها الموبايل او التابلت ونحاول اننا نخليهم يشوفوا اصحابهم ويعملوا اي نشاط مفضل ليهم بحيث انه يشغلهم عن فكرة انهم يمسكوا الموبايل لفترات طويلة.