بقلم : فرح هشام

في الفترة الاخيرة انتشرت حالات كتيرة جدا ما بين خطف وما بين تحرش واغتصاب وما بين سرقة بالاكراه و ما بين قتل.. الحالات دي بتحصل في اغلبها للبنات اذا كانت مش كلها.. ومع الاسف الرجالة في مصر مترسخ في ذهنهم فكرة ان البنت او الست دي شئ اتخلق لملاذاته وشهوته وخدمته وفي نظرهم ان الست مكانها البيت ومينفعش تنزل الشارع او الشغل او المدرسة او الجامعة او اي مكان والا بتكون عايزة يحصلها حاجة وحشة..
بيبرروا دايما غلطاتهم بموضوع اللبس مع العلم بوجود منتقبات وبيحصلهم تحرش وبيحصلهم مدايقات في الشارع.. ونفضل نسأل هنا لحد امتا الستات والبنات هيعيشوا مش قادرين يمشوا بثقة في الشارع مع ان دي ابسط حقوقهم.. لحد امتا هنفضل شايفين ان الست مكانها البيت والمطبخ رغم ان الستات حالياً موجودين في مناصب كبيرة ومحققين فيها نجاحات عظيمه ويمكن بيشتغلوا احياناً بكفأة اعلى من الرجالة.. نتمنى انه يكون في قانون قوي يحمي الستات والبنات اللي بعض الرجالة شايفين ان التحرش بيهم و اغتصابهم و خطفهم و سرقتهم دا شئ عادي طالما نزلت من بيتها.. مع ان الست هي والدتك و اختك و مراتك و بنتك ولكن باردو لسه بعض الرجالة في المجتمع وخصوصا في المجتمع المصري بيطلقوا عليها اسم “العورة” اللي مينفعش تظهر..
العقاب لأي شخص يأذي ست او بنت زي حادثة فتاة المعادي الي كلنا عارفينها لازم عقوبة الي عملوا فيها كدا والي اتقبض عليهم بالفعل تكون الأعدام عشان لو دا محصلش كل يوم هنسمع عن بنت جديده بتموت طالما مفيش عقاب.. و كل بنت اصبحت لازم تكون معاها اداة تحمي بيها نفسها طالما الامان انعدم من الشارع و اصبح الي عايز يعمل حاجة بيعملها وشايف نفسه في غابة.