بقلم : أحمد ناجي

ايه يا حج

الحياة نازلة في دماغي بايدها دق
من يوم ما غبت لحد هذا الآن
ملقتش يوم انسان
يسندني لو مرة
ببكي عليك في القلب
واضحكلهم بره
ايه يا حج ؟!
مش هترجع ولا ايه
خايف الأيام وخايف
كل حد وثقت فيه
كل حد عرفته يابا
مكتفاش بالجرح فيه
غبا قلبه وداس عليا
لو صحيح الاخرة حلوة؟!
خدني عندك او ناديلي
طب اجيلك او تجيلي ؟!
نفسي أشوفك مرة واحدة
يومها تمسح دمع عيني
أي حد يقول : يا بابا
يتفتح جوايا جرحى
وارجع البيت اشكي صورتك
دمعي ينزل في انهيار
كان واحشني أقول.. يا بابا
والمناكفة والهزار
مش باقيلي بعد منك
إلا صورتك بتوسيني
تعرف يا حج :
الحياة صبحت إعادة
والليالي هي هي
حتى مش حاسس سعادة
لما بضحك عيني تلمع والوجع
وأخد زيادة من ملامحي
أصعب اللحظات نصيب
او القدر مكتوب علينا
وأحنا ملناش اختيار
الحياة عداد مأسي
والوجع لايق عليا
بعد منك كان مأسي
رغم انك وانت ماشي
كنت بتوصيني اصبر
وابقي قد المسؤلية
طب هتيجي أزاي يا والدي؟!
وأنت كنت الضهر ليا
اصلب أزاي يعني طولي ؟!
وانت وأخد وانت ماشي
العمود الفقري فيا
شوفت يابا :_ بيقولولي إني يتيم
كل ما أسمعها بودني قبل من جواه يأن
لسه عمري شباب لكني
وقت ما انت غبت عني
حاسس إني بقيت مسن
طب تعالي ومد ايدك لو غلط
ابتسملي زي عدتك لو حزنت
مات والله معاك قلبي
مش لوحدك بس مت.