(يوم ما هموت)
الخميس 12-04-2018 09:38
كتب: محمود علي
فِي يوم ما هاموت هايحصل إيه؟
سؤال لازم إجابة عليه
هاتنسوني؟
مانا عارف
ومين في زمننا دا بيموت بنذكُر ليه؟
في يوم ما هاموت
وبعد الدفن تحديداً!
هايمشي الإبن هوّ وأبوه
يقول الإبن يابابا دا كان مَعتوه
دا كان بيقول كلام الشِعر في عيونها
وإن عيونها دخلوا ف قلبُه يوم سَكنوه
وكان بيقول رموشها ف يوم!
في قلب قصيده جُـم دَبحـوه
وينطق أبوه…
يقول أهو راح لدار الحق ياولَدي
وجوة القبر يبقىٰ يقول رموشها جابوه
-وجوز أصحاب-
وقبل ماموت دا كانوا المعنىٰ للأحباب
وفيهُم حد وبإيدُه مِغسلني
وفيهُم حد جوة القبر دَخلني -وقفل الباب-
وأهُـم ماشيين
بيدعوا بصوت بجد حزين
يقولوا يارب عبدك مات
وكان ف الدنيا دي مسكين
فَ يسمعهُم عجوز شايب يرُد.. آمين
ويجي يقول لبعض كلام
يقول ياولاد صاحبكُم مات
وهيّ الدنيا دي ياولاد بتبقىٰ لمين؟
يقولوا صحيح
وأَحسن إنه مات نايم مماتش جريح
ولا مقتول ولا مبعوت في عِلبة صفيح
وزى كتير ياناس ماتوا
رَح أصبح ذكرى مَرمية في وسط الريح
في يوم ما هاموت!
هايمشي القطر عَ القُضبان بسُرعه وصوت
هايتشال بيت لأنُه قديم
ويتجدد ويبقى بيوت
هايتجوز هنا واحد
وواحد تاني هايفارق عشان مَكبوت
في يوم ما هاموت!
هاتيجي الدنيا وتقول لي
جِريت عُمرك ورايا سنين؟
بقيت مبسوط؟
أنا الدنيا فِضلت وراك
لحد ما جيت بقيت ف القبر هنا مربوط .
