أوجاع الليل “سراب”

السبت 13-01-2018 22:02

 

بقلم أسماء فتحي

البداية: ولا ينام الليل إلا أبو قلب خالى ده مش معناه إن القلب سهران من أوجاع العشق والهيام ده كلام غلط
الفصل الأول: زهرة جميلة فى سن 5 سنين عبارة عن بهجة وبراءة الطفولة عايشة حياتها بفرح وسعادة بتلعب وبتطنطط وبتشخبط على حياتنا كلمة أسمها سعادة
للأسف البراءة بتضيع لما ال 5 سنين دول يزيدوا واحدة واحدة وتبدأ البراءة تقل والفرحة تتلون
والبراءة المرسومة على لوحة بيضا يدخلها لون مكر وخبث وحزن ووجع وحاجات تخلى الحياة كحلى
الأيام زى عقارب الساعة بتلف بسرعة حتى البراءة أخدت نفسها ولمت هدومها ومشيت سابت مكانها للأوحش للكره والخداع والظلم ، كل واحد فينا جواه مشهد كل ما يحزن يفتكر الطفل البرئ اللى ضاع منه ويقول ياااااه ياريتنى ما كنت كبرت لحظة وبقيت ببص على نفسى من مراية الذكريات.
أنا فاكره لما أتخلع ضرسى بسبب المصاصة وفجأة لقيت ضرسى متشعلق فوق فى بوقى ???????????? أنتا يا عم يا اللى أسمك ضرسى ما تنزل بقى لاحسن من كتر الضحك خايفة ابلعك
يااااااه يا مراية الذكريات ضحكتينى لما افتكرت نفسى من كام سنة

الفصل الثانى: كبرت وبقيت 14 سنة وبقيت زى الحمال اللى واقف فى محطة الأوجاع أشيل فى اليوم ألوفاااات وآخر الليل آجى أنام تطلعلى أوجاع أحمالى
وأنا راسى على المخدة كانت اوجاعى أشباح بتطارد أحلامى وكان حلمى الاقى صديق ونسيت أن الصديق اسم انتهى من عهد الرسول والصحابة من زمن وكان الصديق للصديق أبو بكر وأبو بكر مات يا بشر
الصديق دلوقتى مصالح وزى ما بنقول المصالح بتتصالح وفيه حاجة تانية صاحبى دراعى وعمى قرشى صاحبى قطع دراعى وعمى فضل فى مكانه
الصديق أو الصاحب كلمة محفورة فى الكتب

الفصل الثالث: الأوجاع خلتنى أبص كل يوم فى المرآية الآقى جروووح جديدة مشوهه جسمى كإن الزمن بيقولى خدى قلم واتنين وجروووح أكتر عشان لازم يتعلم عليكى حاولت أهرب كتييير من الدنيا للأحلااااام بس الحلم كان كله مآسي وبدل الأحلام الوردية دخلت فيلم رعب حطم باقى حياتى
هربت من الواقع للخيال عرفت إنه شئ من المحال قررت قرار صعب بس الصعب مع مرور الوقت بقى أسهل من حل سؤال فى الإمتحان
حطيت نفسى فى تحدى ركنت القلب والعقل وقولت ده وقت الجنان هاتى ضحكة وسط الحزن تخلى عيونك تلمع فى الشمس وإذا لزم الأمر ارقصى عشان الحزن يتهد مين دول عشان يكسروكى دول شوية أوجاع آلاااام ونهايتهم سراااااب كسرى حيطان الحزن بضحكتك دى حيطان الحزن مهزوزة وعلى تكة وتقع ثمرة الحزن ستقع وشجرة الأفراح ستثمر ضحكات من الأمل والتفاؤل والمرح.

كاريكاتير سومه أبو عوف

اضف تعليق