عمر أدم يحاور المطربة الصاعدة “شيماء المغربي” لـ صوت مصر نيوز
الإثنين 16-04-2018 12:20
حوار وتقديم عمر أدم
أهلاً وسهلاً بيكم أعزائي متابعين موقع “صوت مصر نيوز” النهاردة مكلمين معاكم في سلسلة مشاهير السوشيال ميديا ومعانا النهاردة حد متألق ومتميز جداً حد قدر وهو عنده 16 سنة قدر يحقق نسب مشاهدة عالية جداً علي اليوتيوب والفيسبوك تفتكروا مين معانا النهاردة …..
المطربة الشابة الصاعدة “شيماء المغربي”
أهلاً وسهلاً بيكي يا شيماء ….
أهلاً بيك يا عمر …
عايزينك ف البداية تعرفينا بنفسك ؟
أنا شيماء المغربي من مواليد محافظة الإسكندرية عندي 16 سنة ف الصف الأول الثانوي بحب الغناء جداً جداً يعتبر الغناء بالنسبالي هو الي بيديني طاقة إيجابية للحياة من الاخر يعني الغناء بالنسبالي هو أسلوب حياتي .
من أمتي بدأتي تغني وأي أول حاجة غنيتها ؟
أنا بدأت أغني من وأنا عندي 12 ستة وأول أغنية غنيتها كانت أغنية (( حبه ظروف )) للفنانة (( أصالة )) وعملتلها إعادة توزيع ونزلتها علي شكل كوفر علي مواقع السوشيال ميديا والحمد لله جابت حوالي 5 مليون مشاهدة وبعد كدة المخرج العبقري محمد حسن أوكا مدير شركة فاترينا الي وقف جنبي وبشكره جداً جداً وأنتج أول أغنية ليا وهيا أغنية (( بفكر فيك )) ونزلت بالتحديد يوم 1 / 9 / 2017 وكانت وش الخير والسعد عليا وحققت علي مواقع التواصل الإجتماعي أعلي ملايين المشاهدات وبشكر ربنا وكل الناس الي وقفت جنبي وساعدتني ع النجاح الي وصلتله ده .
مين من المطربين الموجودين علي الساحة دلوقتي بتحبي تسمعيه ومن المطربين بتوع زمان ؟
أنا بحب أسمع من المطربين الموجودين علي الساحة حالياً أصالة و تامر حسني وشيرين عبدالوهاب ومن المطربين بتوع زمان المطربة فيروز وأم كلثوم وورده و عبدالحليم .
شايفه نفسك خلاص حققتي الي بتحلمي بيه وهدفك ولا لسه ؟
لا لسه طبعاً أنا لسه قدامي مشوار طويل ف طريق الغناء ولسه بطور من طريقتي والحمد لله أنا بعمل حفلات كويسة جداً وحفلات كتير كمان وإن شاء الله هعمل نيولوك خاص بيا ف طريقة غنائي الناس هتحبه جداً وهيعجبهم قوي كمان .
نفسك تقابلي مين من المغننين وتغني معاه في حفلة ؟
نفسي بجد أقابل الفنانة أصالة والفنان تامر حسني ونفسي أغني معاهم .
شيماء هل ليكي أعمال جديدة الفترة الجية ؟
أيوة أنا خلصت تصوير كليب إن شاء الله هينزل الفترة الجية أسمه (( قالولك عني )) إخراج محمد حسن أوكا .. كلمات عمر عبده علي .. ألحان عمرو الشاذلي .. توزيع أمجد معتز .. إنتاج شركة فاترينا …. وأنا لسه بصرح أول مرة معاك يا عمر عن الكليب ده وبقول للسادة المشاهدين أستنوه وهيعجبكم قوي .
نفسك تدخلي كلية أي إن شاء الله ؟
أنا نفسي أدخل كلية تربية نوعية وأدرس ف قسم الموسيقي إن شاء الله .
إي الرسالة الي حابه توجهيها لكل الناس الي عندها حلم بس مش عايزة تشتغل وتتعب علشان تحقق حلمها ده ؟ أحب أقول لكل واحد عنده موهبه خليك ورا حلمك الأحلام بتتحقق بس عايزة مجهود وتعب وإخلاص .
بنشكرك يا شمياء علي القاء الجميل ده ويارب تفضلي في نجاح ديماً وتوصلي لحلمك وتحقق كل أحلامك وكل أهدافك .
بشكرك يا عمر ع القاء الممتع ده وبشكر جريدة صوت مصر نيوز . أعزائي متابعين “صوت مصر نيوز”
إستنونا فى تقرير جديد ومع مشهور جديد من وسط مشاهير السوشيايل ميديا .
كان معكم عمر آدم …. أستودعكم الله ….
لمشاهدة الفيديو
